| Опис: |
Родину Андрія Бачового – мого нанашка – знаю дуже давно і дуже добрі. По-перше тому, же нанашко были кантор, то я роками скоро кажду неділю їх виділ і чул в церкві. По-друге, ми мали склеп і корчму, де нанашко час од часу заходили, (не тямлю, жебы даколи пили), а як на громаді виступили, то говорили мудро, інтересно было їх послухати. Окрім того нанашко, як і мій дідо, знали “бачувати” – лічити такы хвороты, які жаден доктор не знал вилічити. Тому родину нанашка знало не лем ціле село, але й широка околиця.
Пізніше тота родина мене заінтересувала тим, же,(окрім нашої родини), она, як перша родина в селі, почала посилати дітей до школы. Перший пішол до Пряшова Юрко, за нам Осиф, а за ними вшиткы дальши діти. Я стежил за тими дітьми, бо они ся добрі вчили, успішно закінчували школы та поступували все выше та выше. Аж троє дітей з той родини закінчили высокы школы; вшиткы троє учили на высокых школах і дотягли – двоє з них – на доцентів, а третій з них – Юрко – на професора університету. Такого не было не лем в нашім селі, але ані в широкій околиці! А дальші четверо дітей закінчили повні середні спеціальні школы.
Правда, й вытерпіла тота родина немало за свої позиції в житті, зокрема за Юркову принципову позицію, за яку двадцять років терпіла не лем Юркова родина, але й ціла велика Бачова родина. Його браття і сестры, але й його жена Люба, мали великы проблемы на роботі, його хлопців не приймали до шкіл, хоч вчилися вони доже добрі.., але вони – ціла родина – тото вшито вытерпіли й пережили – чесно, по-людськы. Про тоту родину ніхто не може кривого слова повісти, она і в селі, і в околиці є прикладом порядності і чесного життя.
Тота родина доказала, же хто має добре виховання з дому, од власних родичів, того не змінить і не зломить ані політика, ані тяжке життя.
Тому я дуже радий, же праві тота Бачова родина выдає до сторіччя од народження свого няня книжку про їх Бачівський рід. – І таке іші ніхто ні в селі, ні в околиці не зробил! – Най буде записано холем дашто з того, што тота родина пережила! Най то буде на пам’ятку поколінням їх роду та й іншим добрим людям. |
